Í morgun kom frekar óvanalegur nemandi að Menntasetrinu á Þórshöfn en það er Gassi gæs. Ekki vildi hann þó koma inn en hann hefur gert sig heimakominn hjá Hildi í Holti undanfarna daga og í dag ákvað hann að elta hana í vinnuna, flaug við hlið bilsins alla leið. Gassi mun vera gæsarungi sem Brynhildur prestur hefur fóstrað í sumar og er saknað þar á bæ. Hann var hinn rólegasti þegar starfsfólkið rauk út með kaffibollann í hendinni að skoða gripinn, hefur nú hreiðrað um sig undir bílnum hennar Hildar en verður komið til fóstru sinnar í dag. Svona var sagan af Gassa gæs frá Skeggjastöðum.
