Sem stendur situr starfsfólk Þekkingarnetsins á símenntunarsviði á árlegum tveggja daga haustfundi Kvasis, samtaka fræðslumiðstöðva. Mikið og náið samstarf er milli fræðslumiðstöðva á Íslandi á hinum ýmsu sviðum símenntunarstarfs og framhaldsfræðslu. Haustfundurinn er haldinn í Varmahlið í Skagafirði, en Óli Halldórsson forstöðumaður fer með formennsku í samtökunum þetta skólaárið.
Margt fróðlegt kemur í ljós þegar símenntunarstöðvarnar á landinu bera saman bækur sínar. Eitt af því er sá mikli fjöldi nemenda á landinu sem sækir þjónustu og námsúrræði innan stöðvanna. Annað er það öfluga netverk sem búið er að mynda á landinu öllu, en þjónustustaðir miðstöðvanna eru 45 á landinu öllu og teygja sig inn í flesta þéttbýliskjarna landsins.
