Nú eru síðustu próf vorannar að klárast hjá háskólanemunum í Þekkingarsetrinu og spennandi verkefni að taka við. Ljóst er að mikið líf verður í setrinu í sumar þar sem um tíu nemendur munu sinna rannsóknarverkefnum sem Þekkingarnetið hefur umsjón með auk þess sem fjölmargir erlendir háskólanemar stunda rannsóknir á sjávarspendýrum undir leiðsögn starfsmanna Rannsóknaseturs HÍ. Einnig er mikill annatími hjá Náttúrustofu Norðausturlands framundan í ýmsum vöktunarverkefnum, mælingum og talningum.
Verkefni sumarnema hjá Þekkingarnetinu eru hluti af átaksverkefni stjórnvalda og fjármögnuð í gegnum Vinnumálastofnun og sveitarfélögin á svæðinu. Sem dæmi um verkefni má nefna hnitsetningu og leiðarlýsingu gönguleiða á svæðinu, hlaðvarp um lífið í Mývatnssveit á árum áður, greiningu á helstu hagtölum svæðisins, smáforrit í ferðaþjónustu, hlaðvarp um þjóðsögur í Þingeyjarsýslum, verkefni um vellíðan og hamingju íbúa, verkefni um óáþreifanlegan menningararf í Þingeyjarsýslum, um sögu Færeyinga í nágrenni Bakkafjarðar og ýmislegt fleira. Mikil ánægja ríkir meðal starfsmanna Þekkingarnetsins um þennan efnilega hóp námsmanna og tilhlökkun til samstarfsins.
