Leitað er að öflugum og drífandi einstaklingi til að leiða uppbyggingarstarf á sviði nýsköpunar á Húsavík. Um er að ræða stofnun nýs frumkvöðlaseturs og nýsköpunarmiðstöðvar með Fab-lab smiðju og vinnuaðstöðu fyrir þá sem vinna að nýsköpunarverkefnum af ýmsu tagi. Miðstöðin byggir á öflugum grunni þekkingarstofnana og verður í nánu samstarfi við atvinnulífið á svæðinu. Þekkingarnet Þingeyinga heldur utan um verkefnið og hýsir starfsmanninn sem leitað er að.
HÆFNISKRÖFUR
- Háskólamenntun sem nýtist í starfi.
- Reynsla og/eða þekking á sviði nýsköpunar.
- Áhugi á samfélagslegri uppbyggingu á svæðinu.
- Drifkraftur og hugmyndaauðgi.
- Frumkvæði og leiðtogahæfni.
- Sjálfstæði í vinnubrögðum.
- Jákvætt hugarfar og brennandi áhugi á viðfangsefninu.
- Framúrskarandi samvinnu- og samskiptahæfni.
- Tækniþekking og innsýn í Fab-lab tæknismiðjur.
- Færni í alþjóðlegum samskiptum.
UM STARFIÐ
- Umsjón með uppbyggingu nýs frumkvöðlaseturs og nýsköpunarmiðstöðvar á Húsavík.
- Umsjón með þróunarvinnu og stefnumótun.
- Umsjón með tæknismiðju.
- Samskipti og samstarf við aðrar nýsköpunarmiðstöðvar, opinbera aðila og aðra þá sem koma að uppbyggingu og starfsemi setursins.
- Starfsstöð er á Húsavík og gert er ráð fyrir því að starfsmaðurinn búi á staðnum og taki þátt í samfélaginu samhliða uppbyggingarstarfinu.
- Starfið er til eins árs með möguleika á lengri ráðningartíma.
Húsavík er fallegur og sögufrægur staður við Skjálfandaflóa. Hann er miðstöð þjónustu og verslunar í Þingeyjarsýslum og vinsæll áfangastaður ferðamanna sem þangað sækja m.a. náttúrufegurð, menningu, sjóböð og hvalaskoðun. Samfélagið á staðnum er fjölskylduvænt og íþrótta- og menningarlíf í blóma. Mikil uppbygging hefur átt sér þar stað undanfarin ár bæði í atvinnulífi og á innviðum. Þekkingargeirinn hefur vaxið mikið og verið í beinum tengslum við atvinnulífið og þróun þess.
Við hvetjum áhugasama til að senda umsóknir og fyrirspurnir til Þekkingarnets Þingeyinga á netföngin oli@hac.is og lilja@hac.is.
Umsóknum skal fylgja ferilskrá og kynningarbréf. Umsóknarfrestur er til 30. apríl nk.
