images

Þekkingarnetið og þróun næstu ára

Undanfarna mánuði hefur Þekkingarnetið leitt hugmyndavinnu við þróun þekkingarstarfsemi héraðsins til næstu ára. Unnið er samtímis að nokkrum verkefnum þessu tengdu, þar á meðal rannsóknaverkefnum um áhrif 4. iðnbyltingarinnar á byggðir landsins. Einnig er unnið að hagnýtari málum sem snúa að samstarfi stofnana og fyrirtækja í héraðinu m.a. með það í huga að stækka þá klasa sem starfa við rannsóknir og þróun á starfssvæðinu og koma þeim undir eitt og sama þakið.  Þekkingarnetið vinnur að þessum málum með hlutaðeigandi stofnunum, þ.m.t. Náttúrustofu Norðausturlands, Rannsóknasetri Háskóla Íslands og SSNE. Vonir standa til þess að í Þingeyjarsýslu verði hægt á næstu misserum að efla verulega starfsemi í atvinnuþróun, rannsóknum og menntunarþjónustu, íbúum og atvinnulífi til góða.  Einn þáttur í þessari endurskoðun þekkingargeirans á svæðinu snýst um að stofnsetja og tryggja í rekstur aukna þjónustu við frumkvöðla og nýsköpunarverkefni um allt hérað. Á þeim grunni er einnig sérstaklega unnið að uppbyggingu öflugs frumkvöðlaseturs á Húsavík, sem mynda muni suðupott atvinnulífs og rannsókna innan um þekkingarstarfsemina.  Viðræður standa yfir um nýja húsnæðiskosti til þessarar starfsemi, einkum á Húsavík og í Mývatnssveit. Heildarhugmyndin um stóran klasa þróunar-, þekkingar- og rannsóknastarfsemi undir einu þaki á Húsavík hefur þannig fengið vinnuheitið „FRYSTIHÚSIГ, sem m.a. vísar til þess að verið er að skoða möguleikann á því að hið nýja setur verði hýst í húsinu í miðbæ Húsavíkur þar sem áður var frystihús Fiskiðjusamlags Húsavíkur. Á sama grunni hefur verkefnið um frumkvöðlasetur á Húsavík fengið vinnuheitið „Hraðið“, sem sem einnig vísar í staðbundnar málvenjur þar sem talað var um „Hraðið“ sem hraðfrystinguna í sama húsi. Engar ákvarðanir hafa þó verið teknar um þessi verkefni eða húsnæðiskosti.

Deila þessum póst

Share on facebook
Share on google
Share on twitter
Share on linkedin
Share on pinterest
Share on print
Share on email
X