.
Árið 2025 var afar viðburðaríkt hjá Þekkingarnetinu þar sem líflegt námsumhverfi, nýsköpun og fjölbreytt rannsóknar- og þróunarverkefni einkenndu starfsemina.
Íslenskukennslan var á margan hátt óhefðbundin og hafði það að markmiði að mæta sem best þörfum nemenda. Í mars lauk hópur nemenda frá Norðurþingi íslenskunámi sem var hluti af verkefninu Farkennarinn – íslenska á vinnustað þar sem íslenskukennslan var færð inn á vinnustaði og kennd á vinnutíma starfsfólks. Jafnframt var unnið að öðru verkefni, Gefum íslensku séns, sem vinnur að því að skapa opinn og aðgengilegan vettvang fyrir samtal og samveru íbúa. Samhliða þessu var í boði hefðbundin íslenskukennsla. Þekkingarnetið hefur lagt sig fram um að efla inngildingu erlendra íbúa í samfélaginu og vann á árinu að viðtalsrannsókn meðal innflytjenda í Norðurþingi með það að markmiði að varpa ljósi á reynslu þeirra og stöðu í sveitarfélaginu. Verkefnið var kynnt á Byggðaráðstefnunni 2025 og er styrkt af Þróunarsjóði innflytjendamála.
Á símenntunarsviðinu var að venju boðið upp á fjölbreyttar námsleiðir Fræðslumiðstöðvar atvinnulífsins ásamt öðrum námskeiðum. Einnig voru í boði sérstök úrræði og námskeið í samstarfi við Vinnumálastofnun og Virk Starfsendurhæfingu. Ný námsleið í Stafrænni smiðju hlaut mjög góðar viðtökur og varð fljótt fullbókuð. Til að mæta eftirspurn var boðið upp á aukanámskeið þar sem nemendur fengu þjálfun í helstu tækjum og tækni Fab Labsins og tækifæri til að þróa hugmyndir sínar og virkja sköpunargáfuna. Hópur Fab Lab leiðbeinenda varð jafnframt til á árinu með nýrri námsleið Leiðbeinendur í Fab Lab sem Þekkingarnetið þróaði í samstarfi við Fræðslumiðstöð atvinnulífsins. Við erum afar stolt af þessum góða hópi sem miðlar áfram þekkingu sinni til ört vaxandi notendahóps smiðjunnar. Í lok árs var svo útskrift nemenda úr stóriðjuskóla PCC sem hefur verið í gangi hjá okkur undanfarin tvö ár.
Á ársfundi Fræðslumiðstöðvar atvinnulífsins í nóvember var nemandi Þekkingarnetsins, Sunnar Rae, valin fyrirmynd í námi fullorðinna 2025 og erum við afar stolt af henni. Hún hefur sýnt einstaka elju og metnað í námi og verið öðrum góð fyrirmynd í því að nýta tækifæri til náms og þróunar í gegnum framhaldsfræðsluna.
Að venju störfuðu háskólanemar hjá stofnuninni yfir sumarið við rannsóknir og önnur verkefni. Löng hefð er fyrir því að háskólanemar öðlist starfsreynslu hjá Þekkingarnetinu og taki þátt í fjölbreyttum verkefnum á vegum stofnunarinnar.
Á árinu komu út skýrslur með niðurstöðum rannsóknar meðal erlendra ferðamanna í Mývatnssveit og á Húsavík. Þar var sjónum beint að ferðavenjum, upplifun gesta og helstu áhrifavöldum í ferðavali þeirra. Sérstaklega voru skoðuð áhrif kvikmynda og sjónvarpsefnis, þar sem áhrif Eurovision-myndarinnar og Game of Thrones komu skýrt fram. Evrópuverkefnið Niche II var áfram í fullum gangi, en það er samstarfsverkefni á sviði starfsmenntunar sem hefur það markmið að styrkja fagfólk á sviði óáþreifanlegs menningararfs.
Mikið líf var hjá Hraðinu, miðstöð nýsköpunar sem fékk til sín rúmlega 3.000 gesti á árinu. Hingað komu m.a. hópar í skapandi vinnu og rannsóknir auk þess sem fjöldi gesta mætti á viðburði og námskeið á vegum Hraðsins. Fab Labið fékk góðar viðtökur og gjafir á árinu, m.a. glæsilega málmfræsivél frá GPG Fiskverkun sem hefur verið mjög vinsæl.
Árlegt „Boot Camp“ Fab Lab smiðjanna á Íslandi var haldið á Húsavík í maí. Um er að ræða þriggja daga viðburð þar sem starfsfólk Fab Lab smiðja alls staðar af landinu kemur saman til að efla samstarf, miðla þekkingu og þróa nýjar hugmyndir. Fab Lab Húsavík var jafnframt valið til að halda fimm daga BootCamp fyrir allar Fab Lab smiðjur á Norðurlöndunum í janúar sem er afar mikilvæg viðurkenning á starfsemi smiðjunnar.
Í mars fór fram hugmyndahraðhlaupið KRUBBUR á Stéttinni þar sem metþátttaka var og sannkallaður stormur hugmynda fyllti húsið. Samstarfsaðilar Hraðsins voru SSNE og Háskólinn á Akureyri.
Í lok september fór svo fram kraftmikið og afar vel sótt HönnunarÞing þar sem fullt var út úr dyrum á fjölbreyttum atriðum hátíðarinnar. Kjarni Þingsins er hönnun og nýsköpun, en á hverju ári er þriðji þráðurinn fléttaður inn í dagskrána til að kanna nýja snertifleti. Í ár var áherslan á mat og matarhönnun. Dagskráin innihélt ávarp menningar-, nýsköpunar- og háskólaráðherra, Loga Einarssonar, fyrirlestra frumkvöðla og hönnuða, sýningar, sköpunarverk matreiðslufólks og tónlistaratriði. Veitingastaðir á Húsavík tóku einnig virkan þátt og prófuðu ný hráefni og brögð, þar á meðal kolmunna, sem hefur sjaldan ratað á diska landsmanna.
Góð ásókn var í fjarpróf á árinu og nýttu margir nemendur aðstöðu Þekkingarnetsins til próftöku í ró og næði nærri heimahögum. Þekkingarnetið bauð venju samkvæmt náms- og starfsráðgjöf fyrir alla íbúa svæðisins og sinnti raunfærnimati til að meta færni og þekkingu starfsfólks á vinnumarkaði. Slíkt mat getur stytt nám og er hvatning fyrir fólk til að ljúka formlegri menntun.
Í lok árs kvaddi Óli Halldórsson Þekkingarnetið eftir rúmlega tveggja áratuga starf sem forstöðumaður. Óli hefur gegnt starfinu frá stofnun og undir hans stjórn hefur starfsemin vaxið og eflst jafnt og þétt. Hans framlag hefur verið ómetanlegt og þökkum við honum frábært starf.
Að lokum færum við öllum samstarfsaðilum og þeim sem komið hafa að starfsemi Þekkingarnets Þingeyinga á árinu okkar bestu þakkir og hlökkum til áframhaldandi samstarfs og þróunar á árinu.