Samhliða grunnþjónustu við námsfólk býður Þekkingarnetið upp á fjölbreytt nám fyrir fullorðna þar sem leitast er við að mæta þörfum samfélagsins og óskum íbúa á starfssvæðinu. Stærstur hluti námsframboðsins byggir á lögum um framhaldsfræðslu og styður við markmið um hagnýtt og atvinnulífstengt nám.

Í þessu starfi er lögð sérstök áhersla á að skapa raunhæf og aðgengileg námstækifæri fyrir fólk á vinnumarkaði sem hefur stutta formlega skólagöngu að baki eða stendur frammi fyrir skertum möguleikum til frekara náms eða virkni á vinnumarkaði. Jafnframt er boðið upp á styttri námskeið sem miða að því að efla færni, áhuga og virkni, auk þess að stuðla að jákvæðri upplifun og félagslegri þátttöku.

Þekkingarnetið er ein af ellefu viðurkenndum símenntunarmiðstöðvum landsins sem starfa á grundvelli laga nr. 27/2010 um framhaldsfræðslu, samkvæmt samningi við mennta- og barnamálaráðuneytið og menningar-, nýsköpunar- og háskólaráðuneytið.